अन्तर्राष्ट्रिय सहकारी महासंघ–आईसीएको एसिया प्रशान्त क्षेत्र (आईसीए एपी) को १६औं साधारण सभा फिलिपिन्सको राजधानी मनिलामा आज सुरु भएको छ । साधारण सभामा २८ मुलुकका १ सय ८ प्रतिनिधिसहित ६ सय बढी सहकारीकर्मीहरुको सहभागिता रहेको छ । यसपटकको आईसीए एपीको साधारण सभाको थिम ‘सहकारीः हाम्रो साझा एजेण्डा’ भन्ने रहेको छ । नेपालको तर्फबाट बैठकमा राष्ट्रिय सहकारी महासंघ, नेफ्स्कून तथा राष्ट्रिय सहकारी बैंकको सहभागिता रहेको छ । महासंघका अध्यक्ष मिनराज कडेलसहित बरिष्ठ उपाध्यक्ष ओमदेवी मल्ल, नेफ्स्कूनकोतर्फबाट बरिष्ठ उपाध्यक्ष चन्द्रप्रसाद ढकाल, सञ्चालक हरेराम पटेल र प्रमुख कार्यकारी अधिकृत डा.शिवजी सापकोटा, सहकारी बैंककातर्फबाट अध्यक्ष केबी उप्रेती लगायत सहभागी हुनुहुन्छ ।
साधारण सभाले आईसीएको क्षेत्रीय निकायको विगत दुई वर्षका कार्यक्रमहरुको समिक्षा गर्नुका साथै भावी नीति तथा कार्यक्रमसहित कार्यदिशा तय गर्ने छ । सभामा सहकारी क्षेत्र र त्यसमा पनि एशिया प्रशान्त क्षेत्रकाका समसामयिक विषयहरुमा पनि छलफल हुने बताइएको छ । सन् २००३ यता पहिलो पटक फिलिपिन्सको सहकारी अभियानले आईसीए एपीको साधारण सभा आयोजना गर्न लागेको हो ।
नोभेम्बर ६ देखि १० सम्मका लागि तय भएको साधारण सभा अन्तर्गत विभिन्न समितिका बैठकहरु सम्पन्न भएका छन् । सम्मेलनको मुख्य विषय साधारण सभा भने आज हुँदैछ । स्थानीय समय अनुसार सभा बिहान ९ बजेदेखि अपरान्ह ४ बजेसम्म बस्नेछ । आजै आईसीए एपी अन्तर्गतको कृषि तथा वातावरण उपसमितिको बैठक पनि बस्दैछ भने साँझ बिदाई भोजको कार्यक्रम आयोजना हुँदैछ ।
यसअघि भएका विभिन्न समितिहरुको बैठकमा संयुक्त राष्ट्र संघले सन् २०३० सम्मका लागि तय गरेको १७ वटा विकासात्मक लक्ष्य हासिल गर्न वित्तीय सहकारीले हालसम्म खेलेको भूमिका, चुनौतीहरु र भावी रणनीतिबारे छलफल भएको थियो । त्यस्तै, वित्तीय सहकारी सञ्चालनका विविध पक्षबारे पनि छलफल भएको छ । । नोभेम्बर ६ मा आईसीए एपीको पूर्ण बोर्ड बैठक बसेको थियो । बैठकमा आईसीएका अध्यक्ष एरियल ग्वार्को पनि सहभागी हुनुभएको छ । प्रत्येक दुई वर्षमा आयोजना हुने साधारण सभा आईसीए एपीको सर्वोच्च निकाय हो ।
सभाकै सेरोफेरामो नोभेम्बर ३ देखि ५ सम्म क्षेत्रीय युवा कार्यशाला आयोजना गरिएको थियो । आईसीए एपी अन्तर्गतको युवा समितिले आयोजना गरेको कार्यशालामा युवाहरुलाई सहकारीप्रकृतिको स्टार्ट अप व्यवसाय सुरु गर्न प्रेरित गर्ने उद्देश्यसहित छलफल भएको छ । कार्यशालाले त्यसका लागि २ वर्षे कार्य योजना तयार पार्ने लक्ष्य लिएको छ ।
सभाको सेरोफेरोमा भोलि नोभेम्बर ८ मा ‘कोअपरेटिभ्स आवर कमन एजेन्डा’ थिममा सहकारी ११औं एशिया प्यासिफिक कोअपरेटिभ फोरम पनि आयोजना हुँदैछ । भोलि नै आईसीए एपीले पहिलो पटक सुरुवात गरेको आईसीए एपी कोअपरेटिभ एक्सिलेन्स अर्वाड पनि घोषणा गरिदैछ । सहकारी क्षेत्रमा उत्कृष्ट कार्य गर्ने व्यक्ति, संस्था र नियामक निकाय गरी ३ विधामा यो पुरस्कार दिइने आईसीए एपीले जनाएको छ ।
विश्व सहकारी अभियानको सर्वोच्च निकाय आईसीए अन्तर्गत हाल आईसीए एपी, आईसीए अफ्रिका, आईसीए युरोप र आईसीए अमेरिकाज् गरी ४ वटा क्षेत्रीय कार्यालय रहेका छन् । सन् १९६० मा स्थापना भएको आईसीए एपीको मुख्यालय भारतको राजधानी नयाँ दिल्लीमा अवस्थित छ भने पहिलो क्षेत्रीय साधारण सभा सन् १९९५ मा नयाँ दिल्लीमानै आयोजना गरिएको थियो । आईसीए एपी अन्तर्गत हाल २८ राष्ट्रका करिब १ सय ८ सहकारी सदस्य रहेका छन् । आइसीए एपीको अध्यक्षमा भारतका प्रसिद्ध सहकारीकर्मी डा.चन्द्रपाल सिंह निर्वाचित भएपछिको पहिलो पटक साधारण सभा आयोजना हुन लागेको हो ।