इटहरी । प्रदेश नं १ सहकारी रजिष्ट्रार कार्यालयले आफ्नो नियमन अधिकार क्षेत्रभित्रका सहकारीहरुलाई आगामी फागुन २० गतेभित्र वार्षिक प्रतिवेदन पेश गर्न सूचना जारी गरेको छ । प्रदेश सहकारी रजिष्ट्रार कार्यालय, इटहरीले सूचना प्रकाशित गरी सहकारीलाई वार्षिक साधारण सभाबाट पारित आर्थिक वर्ष २०७६ ०७७ को को लेखापरीक्षण प्रतिवेदन सहितको वार्षिक प्रतिवेदन अनिवार्य पेश गर्न निर्देशन दिएको हो ।
कार्यालयले आफ्नो नियमन क्षेत्राधिकारभित्रका सहकारी संघरसंस्थाहरुको तथ्याङ्क अद्यावधिक गरी चाँडै पुस्तिका प्रकाशित गर्ने उद्देश्य लिएकाले प्रतिवेदन संकलन कार्यलाई अभियानको रुपमा संचलान गरेको जनाएको छ ।
तोकिएको समयमा प्रतिवेदन पेश नगर्ने सहकारीलाई निष्क्रिय सूचीमा राखी पुस्तिका प्रकाशित गर्ने तथा प्रचलित कानून बमोजिम जरिवाना लगायतको कारवाही समेत अगाडि बढाउने कार्यालयले सूचनामा उल्लेख गरेको छ । संघीय सहकारी विभागको तथ्यांक अनुसार प्रदेश १ मा कुल ४ हजार ७ सय ३७ सहकरी छन् भने सदस्य सङ्ख्या जम्मा ९ लाख ३५ हजार ७ सय रहेको छ ।