हाम्रो ‘नेटवर्क’ नै हाम्रो ‘नेटवर्थ’ हो

प्रत्येक वर्ष विश्व ऋण परिषद्ले विश्वभरका वित्तीय सहकारीहरुको तथ्याङ्क सार्वजनिक गर्दछ । यसका लागि हामी विश्व क्रेडिट युनियन अभियानको सर्वेक्षण गर्छौं । पछिल्लो सर्वेक्षण अनुसार हामीसँग ८२ हजार ७ सय बढी वित्तीय सहकारीहरु छन् । विश्वका ९८ मुलुकमा फैलिएको यो अभियानमा ४० करोड बढी सदस्य अटाएका छन् । तथ्याङ्क हाम्रो तागत हो । यसले हाम्रो शक्ति र सामर्थ्य प्रस्तुत गर्दछ । यसले हामीलाई इतिहास स्मरण गराउँदछ र भविष्यका लागि पनि मार्गनिर्देश दिन्छ । भावी रणनीतिहरु तय गर्न मद्दत गर्दछ । तथ्याङ्क हाम्रो प्रमाण वा सबुत पनि हो । विश्व क्रेडिट युनियन अभियानको यो तागतले हामी एक्लै छैनौ भन्ने पुष्टि गर्दछ । हामी आ–आफ्नो समुदायमा वा कार्यक्षेत्रमा काम गर्छौं होला तर हाम्रो सञ्जाल विश्वभर फैलिएको छ, हामी विश्वभर फैलिएको ठूलो सञ्जालको एउटा हिस्सा हौं भन्ने आत्मबल र विश्वास जागृत गराउँदछ । हामी विश्व परिवार हौं । 

विश्व ऋण परिषद् के मा विश्वास गर्छ र आफ्ना सदस्यहरुलाई पनि विश्वस्त पार्न खोज्छ भने–हाम्रो ‘नेटवर्क’ नै हाम्रो ‘नेटवर्थ’ हो । हाम्रो सञ्जाल हाम्रो सम्पत्ति हो । ओकूले आफ्ना सदस्य संघ संस्थाहरुसँग बनाएको सम्बन्ध यसको शक्ति हो । हामी सबै मिलेर सहकारी वित्त प्रणालीलाई मजबूत बनाइरहेका छौं । 

ओकूले हरेक सदस्यलाई बचत ऋण सहकारी सिद्धान्तप्रति निष्ठावान रहेको लिखित प्रतिबद्धताका लागि आग्रह गर्दछ । यो पूर्वसर्त पनि हो । आज हामी यी सिद्धान्तबारे चर्चासँगै विश्वका केही प्रतिनिधि संघ संस्थाहरुमा यी सञ्चालन सिद्धान्तहरु कसरी लागू गरी सदस्यहरुको बहुआयामिक जीवनस्तरमा परिवर्तन ल्याइएको छ भनेर उदाहरणहरुबारे जानकारी लिन्छौं । विश्व क्रेडिट युनियन अभियान विविधताको अभियान हो  । हामी  अनेतकतामा विश्वास गर्छौं । मुलुकका हिसाबले, अनुभवनका हिसाबले, सदस्यता र कारोबारका हिसाबले अनि महत्वपूर्ण विषय भनेको हाम्रा साझा चुनौतीहरुलाई हामी आफूले कसरी आफ्नोतर्फबाट सम्बोधन गर्छौं भन्ने आधारमा विविधता वा अनेकता झल्कन्छ ।

सहकारी संरचना
यसभित्रका तीनवटै सिद्धान्त हाम्रो धडक्न हो । यिनलाई हामी महसूस गर्छौं । यी हाम्रा अनुभूति हुन् । हाम्रो डिएनए मै छ । हामी (क्रेडिट युनियनहरु) सदस्यहरुद्वारा प्रजातान्त्रिक अधिकारको पूर्ण प्रयोग गरी सञ्चालित एवम् नियन्त्रित छौं । कतिपय अवस्थामा हामीले यो विषयलाई हलुका रुपमा पनि लिनसक्छौं तर त्यसो होइन । जब क्रेडिट युनियनहरु बढ्दै जान्छन्, सदस्य वृद्धि हुन्छ र आधुनिक बन्दै जान्छन्, तब सदस्य सहभागिता, प्रतिनिधित्व तथा नियन्त्रणको विषयमा पनि केही परिवर्तन महसूस गर्छौं । संस्था सानो हुँदा प्रत्येक सदस्यको प्रत्यक्ष सहभागिता हुन्छ संस्था सञ्चालनका गतिविधिहरुमा । ठूला वित्तीय सहकारीहरुको हकमा अहिले विश्वमा प्रत्यायोजित (प्रतिनिधिमूलक) सहभागिताको अवधारणा अघि बढेको छ । 

म काम गरिरहेको कोस्टारिकामा पनि यसको उदाहरण पाउन सकिन्छ । यहाँको ठूला क्रेडिट युनियनमध्येको एक ‘कोपिआलिआन्जा’ को वार्षिक साधारण सभामा ३ सय प्रतिनिधिमूलक सदस्यहरु सहभागी हुन्छन् जो संस्था सञ्चालनको गतिविधिमा बाँकी सदस्यहरुबाट अख्तियार प्राप्त गरी सहभागी हुन्छन् । त्यस्तै, एक्वेडोरको ‘हार्डिनाजवायो’ क्रेडिट युनियनले आफ्नो शाखा कार्यालयहरुको भौगोलिक अवस्थितिलाई आधारमानी ६० जना प्रतिनिधिहरुको समूह निर्वाचित गर्दछ । तीनै ६० जनाले साधारण सभामा सम्पूर्ण सदस्यहरुको प्रतिनिधित्व गर्छन् ।

त्यस्तै, ब्राजिलमा रहेको ओकूको सदस्य सिक्रेडी विविध कारणले विश्व सहकारी अभियानको लागि अत्यन्तै लोभलाग्दो उदाहरण बनेको छ । सिक्रेडी त्यहाँका १ सय ५ बढी क्रेडिट युनियनहरु, ५ केन्द्रहरु र २५ सय सेवा केन्द्रहरुको ‘कन्फेडेरेशन’ हो । यो ब्राजिलको सबैभन्दा ठूलो र पुरानो क्रेडिट युनियन प्रणाली हो । उनीहरुबीच साझा प्लेटफर्म प्रयोग हुन्छ । यो सहकार्यात्मक संरचनाका माध्यमबाट उनीहरुले अनुकरणीय उन्नत वित्तीय सेवा प्रवाह गर्दै आएका छन् । यसको सञ्जालभित्र ७० लाख सदस्य छन् । सिक्रेडीको ‘गभनेन्स’ संरचना सबल र उत्कृष्ट छ । दिगोपनाको रणनीति पनि त्यतिकै उदाहरणीय छ । उनीहरुको दिगोपनासम्बन्धी वार्षिक रणनीति पनि अध्ययन गर्न लायक छ । 

सिक्रेडीमा सदस्यहरुदेखि ‘न्यूक्लियएस कोअर्डिनेटर’ हुन्छ जसले शाखा केन्द्र स्तरमा स्थानीय आवश्यकता, अपेक्षा, समस्याहरुको प्रतिनिधित्व गर्छ । ती न्यूक्लियस कोअर्डिनेटरहरुले आफ्नो क्रेडिट युनियन सञ्चालनको लागि सञ्चालकहरु नियुक्त गर्छन् । एक सदस्य एक मतको क्रेडिट युनियन सञ्चालनको यही सिद्धान्त अनुरुप कन्फेडेरेशन पनि चल्छ । यसो गर्दा संस्था सञ्चालनमा सदस्यहरुको प्रत्यक्ष र दरिलो सम्बन्ध कायम रहन्छ । 

ब्राजिलका २ सय १७ सहरमा सिक्रेडी अन्तर्गतका क्रेडिट युनियनहरु नै एकमात्र वित्तीय संस्थाका रुपमा सदस्य सेवा प्रदान गरिरहेका छन् । हामी अनुमान लगाउन सक्छौं विश्वको ठूलो मुलुकमध्येको एक ब्राजिलका २ सय १७ सहरमा क्रेडिट युनियन नहुँदा हुन त् ती शहरबासीहरु वित्तीय संस्थाको सेवा बाट वञ्चित हुन्थे । ती शहरमा सिक्रेडी सफल हुनुको कारण उसको (क्रेडिट युनियनको) बिजनेश मोडल हो जसले सदस्यलाई केन्द्रमा राख्दछ । संस्था सञ्चालनको माथिल्लो निकायमा तिनै सदस्यहरुलाई पु¥याउँदछ । त्यसको तल्लो तहमा स्वयंसेवी ‘न्यूक्लियस कोअर्डिनेटरहरु’ निर्वाचित हुन्छन् । त्यस्ता न्यूक्लियस क्रोअर्डिनेटरहरु प्रत्येक क्रेडिट युनियनबाट प्रतिनिधित्व गर्दछन् । यो तरिका प्रभावकारी प्रमाणित भएको छ ।

मैले धेरै पटक सिक्रेडी भ्रमणको अवसर पाएको छु । उनीहरुको स्थानीय शाखाको वार्षिक भेलामा सहभागी भएको थिएँ । अर्को भनेको सिक्रेडीले प्रविधिलाई आफ्नो सेवाका सबै क्षेत्र र पक्षसँग एकीकृत गरेको छ । वार्षिक साधारण सभामा सहभागी सदस्यहरुको पहिचानको लागि बायोमेट्रिक गरिन्छ । मतदानमा पनि प्रविधि प्रयोग गन्छि ।

ब्राजिलकै अर्को उदाहरण दिदाँ, पनि संस्था सञ्चालन तथा सुशासनका लागि प्रविधिको प्रयोग भएको पाइन्छ । सिकोबी नामको वित्तीय सहकारीले एप निर्माण गरेको छ जसमार्फत सदस्यहरु संस्था सञ्चालनको प्रक्रियामा सहभागी हुन्छन् । यसमार्फत सदस्यहरुलाई मतदानमा सहभागी हुन सहज भएको छ भने संस्थाका वित्तीय विवरणहरु पढ्न, आफ्नो कारोबारबारे जानकारी लिन, बैठकहरुबारे जानकारी उपलब्ध गराउन तथा सदस्य शिक्षाका सामाग्रीहरु पस्कन फाइदा पुगेको पाइएको छ ।

सदस्य सेवा
यस अन्तर्गत वित्तीय समावेशिता एउटा महत्वपूर्ण विषय हो । साझा बन्धनको माध्यमबाट वित्तीय सहकारीहरु एक भएका हुन्छन् । त्यही साझा बन्धनको सूत्रमा बाँधिन सबैका लािग क्रेडिट युनियनको सदस्यता स्वेच्छिक र खुला रहन्छन् । त्यही साझा बन्धनकै आधारमा सबैको वित्तीय समावेशिता सुनिश्चित गरिन्छ । सदस्यताको सन्दर्भमा क्रेडिट युनिनहरुले अनेक रुपमा यो साझा बन्धन अभ्यास गरेको पाइन्छ । कहीकतै धार्मिक आधारहरु सदस्यहरु जोडिने माध्यम बनेका छन् । खासगरी ल्याटिन अमेरिकाका धेरै क्रेडिट युनियनहरुमा सुरुवाती दिनमा सदस्यहरुबीच साझा बन्धन धार्मिक आस्था बनेको पाइन्छ । एकै प्रकृतिसँग सम्बन्धित कर्मचारीहरु पनि साझा बन्धनको सुत्र भएको छ भने धेरै ठाउँमा निश्चित भूगोल सदस्यहरु अटाउने एउटै बन्धन भएको छ । यी बाहेक केही पृथकता पनि पछिल्लो समय सदस्यहरु जोडिने साझा बन्धन भएको छ । 

अमेरिकाको ‘क्लिन एनर्जी क्रेडिट युनियन’ ले वातावरणीय दिगोपनालाई केन्द्रमा राखेर ऋण लगानी गरेको छ । यो संस्थाले विद्युतीय सवारीसाधन, सौर्य उर्जा आदिमा लगानी गर्ने, कृषि तथा हरित अर्थतन्त्र प्रवर्धन गर्ने कार्यमा लगानी गर्दछन् । उसको ध्यान संस्थामा भित्रिने बचत तथा निक्षेप पृथ्वी बचाउने अभियानका लागि लगानी गरिनुपर्छ भन्ने रहेको छ । यो पृथक नवीन र अपिरहार्य साझा बन्धन हो । समयको माग सम्बोधन गर्ने उपयुक्त साझा बन्धन हो । कार्बन न्यूट्रल क्रेडिट युनियन बनाउने उनीहरुको अभियान हो । यो संस्था स्थापना भएको एक दशक मात्रै भएको छ तर यसले द्रुत गतिमा प्रगति गरेको छ किनकि यसको साझा बन्धन निक्कै बलियो छ । यसमा सदस्य र सम्भावित सदस्यहरुको साझा इच्छा र चाहना जोडिएको छ । समुदायलाई पनि यो विषयले तानेको छ ।

अर्को महत्वपूर्ण विषय भनेको हामीले वित्तीय पहुँच नपुगेकाहरुलाई सहयोग गर्नैपर्छ । ल्याटिन अमेरिकाका धेरै मुलुकहरुमा राजनीतिक र आर्थिक संकट चलिरहेको छ । यसका कारण शरणार्थी र आप्रवासन समस्या यो क्षेत्रभरनै चुलिदो छ । क्रेडिट युनियनहरुका लागि यो अवसर पनि हो । क्रेडिट युनियनहरुको सामूहिक सामथ्र्य प्रयोग गरेर शरणार्थी र आप्रवासीहरुलाई सहयोग र वित्तीय पहुँचको हकदार बनाउन सकिन्छ । यसैलाई ध्यानमा राखेर अमेरिकामा हुन्टोस आभान्जामोस् (सँगै हामी अघि बढ्छौं) नामको एउटा प्रमाणीकरण कोर्ष पनि तयार गरिएको छ ।

यसले अमेरिकामा बस्ने हिस्प्यानीक (क्यूबा, ब्राजिल, अर्जेन्टिना, कोलम्बिया, बोलिभिया, उरुग्वे, भेनेजुएला, मेक्सिको, पुवर्टो रिको आदि) मूलका नागरिकहरुलाई उनीहरुकै भाषा, संस्कृति, परम्परा, परिवेश मिल्ने गरी आधारभूत आवश्यकतासँगै अन्य वित्तीय सहयोग र सामाजिक सेवा उपलब्ध गराउने मान्यता क्रेडिट युनियनहरुलाई प्रदान गर्दछ । यस्ता प्रमाणीकृत कोर्षमार्फत क्रेडिट युनियनहरुले ल्याटिनो समुदायको सामाजिक, आर्थिक लगायत विकासमा सहयोग गर्दछन् । वित्तीय मात्र नभइ सबै हिसाबले जोखिममा रहने ल्याटिनो समुदायको हक हित संरक्षणका लागि समेत यस्ता क्रेडिट युनियनहरुले काम गर्दछन् । क्रेडिट युनियनहरुले के कस्ता क्षेत्रमा काम गर्न सक्छन् र गरेका छन् भन्ने यो राम्रो उदाहरण पनि हो ।

अर्को भनेको वित्तीय दिगोपना हो । त्यसका लागि बलियो जगेडा कोष आवश्यक पर्दछ । संस्थागत पूँजी निर्माण सदस्यहरुलाई चीरकालसम्म सेवा प्रवाह गर्न बलियो संस्थागत पुँजी र बलियो आन्तरिक नियन्त्रण प्रणाली हुनुपर्दछ । ल्याटिन अमेरिकाको कुरा गर्ने हो भने यहाँका क्रेडिट युनियनहरुले रणनीतिक परिवर्तनमार्फत संस्थागत पुँजी वृद्धि गरेका छन् । विगत लामो सयमको अभ्यास भनेको सेयर पुँजी वृद्धि । सदस्यले न्यूनतम सेयरका अतिरिक्त छोटो समयमा फिर्ता गर्न नमिल्ने गरी निरन्तर सेयर वृद्धि गर्नुपर्ने प्रावधानहरु कायम गरिएको थियो जुन संस्थागत पुँजीका रुपमा रहन्थ्यो ।
अमेरिका, क्यानाडा लगायत अन्य मुलुकहरुमा भने हामी यो अभ्यास पाउँदैनौं जहाँ संस्थागत पुँजी भनेको आर्थिक वर्षको अन्त्यमा आर्जित मुनाफाबाट वृद्धि गरिन्छ ।

त्यस्तै, अर्को पाटो भनेको प्रविधि रुपान्तरणमा खर्च गर्न क्रेडिट युनियनहरुको पर्याप्त वित्तीय स्रोतको उपलब्धता हो । यसले क्रेडिट युनियनहरुको ‘सान्दर्भिकता संरक्षण’ गरिरहन्छ । होइन भने अन्य बैंक तथा वित्तीय संस्थाहरुसँगको प्रतिस्पर्धामा हामी पछि पर्छौं । अर्को भनेको जलवायु परिवर्तनको जोखिमको विषय पनि छ जसले दिगोपनामा असर गर्छ । वित्तीय दिगोपनाभित्र यो विषय पनि पर्दछ । अर्को, सदस्यहरुको आर्थिक लाभको वृद्धि गर्ने विषय हो । बचत तथा निक्षेपमा न्यायपूर्ण ब्याजदर प्रदान गर्नु हो । त्यस्तै, क्रेडिट युनियनका बचत तथा ऋण प्रडक्टहरु सदस्यहरुको आर्थिक सामजिक कल्याणलाई ध्यानमा राखेर विकास गरिनुपर्दछ । 

अमेरिकाको क्यालिफोर्निया राज्यका क्रेडिट युनियनहरुले ‘ब्याड प्रेस’ आमन्त्रण गरेका छन् । सञ्चारमाध्यममा उनीहरु सम्बन्धी नकारात्मक समाचार सम्प्रेषण भएका छन् । क्रेडिट युनियनहरुले अत्यधिक ओभरड्राफ्ट शुल्क (ऋण सेवा शुल्क वा नवीकरण शुल्क) लिने गरेका छ्न् । यो विषय हामीले भन्दै आएको सञ्चालनका सिद्धान्त विपरित छन् । यो क्रेडिट युनियनहरुको लागि जोखिमको एउटा महत्वपूर्ण विषय हो । हाम्रो काम सदस्यहरुको सुरक्षा, उनीहरुलाई साथ र सहयोग उपलब्ध गराउने हो । सबैभन्दा न्यून अवसर भएकाहरुलाई उठाउने संरक्षण गर्ने हाम्रो मुख्य काम हो । हामीले हाम्रो स्थापनाको उद्देश्य पूरा गर्नुपर्छ ।

सकारात्मक पाटोमा हेर्ने हो भने इस्टोनियामा क्रेडिट युनियनहरुले ‘विन्ड फाम इन्भेष्टमेन्ट’ को अवसर सृजना गरेका छन् जसमार्फत समुदायस्तरमा वायुउर्जा उत्पादनमा सहयोग गरेको छ । यसबाट मुनाफा वृद्धि भएको छ । सदस्यहरुले लाभांशसँगै ५.५ प्रतिशत ‘रिटर्न’ पनि प्राप्त गरेका छन् । 

सामाजिक उत्तरदायित्व

अर्को, सामाजिक उत्तरदायित्वको सिद्धान्त छ । यसभित्र क्रेडिट युनियनहरुले आफ्ना सदस्यहरुको सामाजिक, आर्थिक, प्रजातान्त्रिक तथा व्यक्तित्व विकासमा भूमिका खेल्नुपर्दछ । अमेरिकामा क्रेडिट युनिनयहरुले माध्यमिक तथा उच्च माध्यमिक विद्यालयमा शाखाहरु खोलेका छन् । उनीहरुले विद्यार्थीहरुलाई वित्तीय साक्षरता प्रदान गरेका छन् । ती विद्यार्थीहरु अध्ययनसँगै ती क्रेडिट युनियनमा काम पनि गर्दछन् । उनीहरुले क्रेडिट युनियन के हुन् यिनले कसरी काम गर्छन्, बैंक र क्रेडिट युनियनबीच के अन्तर छ आदिबारे जानकारी पनि प्राप्त गर्दछन् । बचत गर्दछन् । उनीहरुका लागि काम गरेरै जानकारी लिने अवसर मिलेको छ । 

त्यस्तै, ल्याटिन अमेरिकामा क्रेडिट युनियनहरुले आफ्नो खुद आम्दानीको ५ प्रतिशत वा त्यो भन्दा बढी रकम सदस्य, सञ्चालक तथा कर्मचारीलाई सहकारी शिक्षाका लागि छुट्याउनुपर्ने कानूनी प्रावधान रहेको छ ।

सिक्रेडीको कुरा गर्दा यसले लामो समय सम्म युवा जमातलाई क्रेडिट युनियनतर्फ आकर्षित गर्न संघर्ष गरेको थियो । त्यसको समाधानका साथै युवाहरुलाई सञ्चालक समितिमा सहभागिताका लागि उसले युवा समिति निर्माण गर्यो र युवाहरु लक्षित २ वर्षे कार्यक्रम पनि लागू गर्यो । उक्त कार्यक्रमले युवाहरुलाई सहकारी, क्रेडिट युनियन सिद्धान्त, पैसाको व्यवस्थापन, बचत, नेतृत्व क्षमता, उद्यमशीलता, अन्तर्राष्ट्रिय परियोजनासँग आवद्धतको अवसर आदि प्रदान गर्यो । यसो गर्दा उसले सहकारी, क्रेडिट युनियनसँगै वित्तीय व्यवस्थापनको विषय पनि जोड्यो । सन् २०२० मा सुरु गरेको यो कार्यक्रमको सहयोगमा ४१ युवाले क्रेडिट युनियनमा नेतृत्व लिइसकेका छन् । यो अभ्यास ल्याटिन अमेरिकी र अन्य मुलुकहरुले पनि अवलम्बन गर्न थालेका छन् । यसले युवा नेतृत्व जन्मन्छ ।

यसैगरी, समुदायप्रतिको जिम्मेवारीको कुरा गर्दा क्रेडिट युनियनहरुले आत्मसहयोग, पारस्परिक सहयोग, आर्थिक सशक्तिकरणका लागि अनेक काम गरेका छन् । न्यायी, स्वस्थ्य र समृद्ध समुदाय निर्माणमा क्रेडिट युनियनहरु सहयोगी बनेका छन् । कोलम्बियामा केही क्रेडिट युनियनहरु मिलेर हरित सहकार्य ‘ग्रीन कोअपरेशन’ अभियान सञ्चालन गरेका छन् जसले जलवायु परिवर्तनका दिशामा काम गर्दछ । वनजंगल विनाश र भुक्षय, माटोको उर्वराशक्तिमा भएको क्षयीकरण आदि विषयमा संवेदनशील भई हरियाली पुनजागृत गर्ने काम उनीहरुले अघि बढाएका छन् ।

एक्लै असम्भव हुने र ज्यादै न्यून परिवर्तन सम्भव हुने विषयमा सहकारिताको मर्म अनुरुप उनीहरु एकजुट भएर समुदाय भन्दा माथि उठेर पृथ्वी जोगाउने अभियानमा अनुकरणीय काम गरेका छन् । एक्लै सहकारीहरुले गर्ने यस्ता काम भन्दा समुदायका थुप्रै सहकारीहरु मिलेर यस्तो काम गर्दा प्रभाव र परिणाम दुबै फराकिलो हुन्छ । विगत १३ वर्षमा यो अभियानमार्फत हजारौं हेक्टर घाँसे मैदानहरु बनजंगलमा रुपान्तरित भएका छन् । संकटमा रहेका वन्यजन्तुको वासस्थान संरक्षण गरेका छन् भने मौरीपालन, च्याउखेती सञ्चालन गरेका छन् । यसले ग्रामीण र न्यून आए भएका स्थानीय बासिन्दाहरुलाई आयआर्जनका नयाँ अवसर प्रदान गरेको छ । त्यस्तै, लागूऔषध ओसारपसार र अर्धसैनिक हिंसाग्रस्त मुलुकमा पनि यस्ता हरित वातावरणले समस्या समाधान र उपचारात्मक विधिमा सहयोग गरेको छ । यस्ता थुप्रै कथाहरु छन् क्रेडिट युनियनमार्फत भएगरेका । 

त्यस्तै, सञ्जाल सहकार्य अन्तर्गतको विषय सहकारीहरुबीच सहकार्यको सिद्धान्तमा आधारित छ । ल्याटिन अमेरिका, अमेरिका तथा अन्य मुलुकहरुमा क्रेडिट युनियन सर्भिस अर्गनाइजेशन (क्यूसो) नामक संस्थाहरु स्थापना भएका छन् । यस्तो संस्था साझा समस्याहरुको साझा प्रयासका माध्यमबाट साझा समाधान खोज्ने संस्थाहरु मिली स्थापना गरिएका हुन् । यस्तो सहकार्यका लागि गरिएको लगानी क्रेडिट युनियन समुदाय भित्रै रहन्छ । 

अमेरिकामा क्यूसोमार्फत कोअप् सोलुसन नामक संस्थाले साझा ब्राञ्च सञ्जाल सञ्चालन गर्दछ । यसको सहयोगमा एउटा भेगको एउटा क्रेडिट युनियनको सदस्यले अर्को स्थानमा रहेको अर्को क्रेडिट युनियनको शाखामार्फत आफ्नो कारोबार गर्न सक्दछ । यस्तै उनीहरुको देशव्यापी एटीएम सञ्जाल पनि छ । अमेरिकामा क्रेडिट युनियनहरुको यो साझा सञ्जाल त्यहाँको सबैभन्दा ठूलो बैंकको सञ्जाल भन्दा ठूलो छ । यसले के देखाउँछ भने सहकार्यमार्फत ठूला काम गर्न र प्रतिस्पर्धी स्थान हासिल गर्न सहयोग मिल्दछ ।

अर्को, विश्वव्यापी परिकल्पनाले पनि हामी जोडिएका छौं । ओकूले यो विषयलाई प्राथमिकताका साथ प्रवर्धन गरेको छ । क्रेडिट युनियनको यो विश्व समुदायलाई बलियो बनाउने, यसका सिद्धान्तहरुको प्रवर्धन र प्रतिरक्षा गर्ने काम ओकूले गर्दै आएको छ । हामी जे काम गर्छौं ती सबैको केन्द्रविन्दूमा सदस्य रहन्छन् ।

(नेफ्स्कूनको प्राविधिक सहयोग एवम् नेफ्स्कून-साकोस म्योजर्स क्लबको आयोजनामा सन् २०२४ अप्रिल १ अर्थात् १९ चैत २०८० मा सञ्चालित क्यूमेल्स सिरिजको छैठौं एपिसोडमा गरिएको सहजीकरणको सम्पादित अंश)