मकवानपुरमा ऋण व्यवस्थापन तथा सुरक्षित ऋण परिचालन तालिम सम्पन्न

नेफ्स्कून सदस्य सेवा कार्यालय, मकवानपुरको आयोजनामा आज ऋण व्यवस्थापन तथा सुरक्षित ऋण परिचालन तालिम सञ्चालन गरिएको छ । तालिममा ३१ साकोसका २४ महिला र ८ पुरुष गरी ३२ जनाको सहभागिता रहेको थियो । 

तालिम समापनमा बोल्दै मकवानपुर जिल्ला बचत संघकी अध्यक्ष कल्पना श्रेष्ठले संस्थाले नीति अनरुप ऋण लगानी गर्नुपर्ने भन्दै अनुत्पादक क्षेत्रमा लगानी गर्दा समस्या आउने बताउनुभयो । उहाँले सदस्यहरुका लागि ऋण सदुपयोगिता सिकाउन तालिम र कार्यक्रमहरु संचालन गर्नुपर्नेमा जोड दिनुभयो । नेफ्स्कून मकवानपुर सदस्य सेवा केन्द्र व्यवस्थापन उपसमिति सदस्य समेत रहनुभएकी श्रेष्ठले सिकाइलाई व्यबहारमा लागु गर्न तालिमका सहभागीहरुलाई आग्रह गर्नुभयो । 

त्यस्तै, उपसमिति सदस्य बिजय बहादुर बस्नेतले आर्थिक मन्दी तथा वित्तीय संकटको अवस्थामा क्षमतामा आधारित ऋण लगानी गर्नुपर्ने, ५ सी बिश्लेषण अनिवार्य गर्नुपर्ने र सदस्यलाई ऋण लगानी तथा असुली गर्दा सम्मानजनक व्यवहार गर्नुपर्ने बताउनुभयो । उपसमितिका अर्का सदस्य राजु गौतमले संस्थाको मुटु ऋण भएकोले त्यसलाई व्यबस्थित रुपमा लगानी गर्नु पर्ने भन्दै कसैको सिफारिसको आधारमा काम गर्न नहुने, सहकारी सुशासनमा चल्नुपर्ने र सहकारी शिक्षा कार्यक्रम व्यापक गरी सहकारीप्रतिको नकरात्मक भ्रम चिर्नुपर्ने धारणा राख्नुभयो । नेफ्स्कूनका तालिम अधिकृत रबिन्द्र श्रेष्ठले सहजीकरण गर्नुभएको तालिमको व्यवस्थापन नेफ्स्कून सदस्य सेवा कार्यालय मकवानपुरकी इन्चार्ज ज्योति महतले गर्नुभएको थियो ।