‘कोअप्स डे’ थिम २०२१ र जो बाइडेन ‘कनेक्सन’

एजेन्सी । विश्वभर जुलाई ३ अर्थात् असार १९ मा ९९ औं अन्तर्राष्ट्रिय सहकारी दिवस मनाइएको छ । यस वर्षको ‘कोअप्स डे’ को थिम ‘रिबिल्ड बेटर टुगेदर’ तय गरिएको घोषणा गत अप्रिल १४ मा गरिएको थियो । यो पटक २७ औं संयुक्त राष्ट्र संघीय अन्तर्राष्ट्रिय सहकारी दिवस पनि थियो भने नेपालमा सहकारी अभियानको सर्वोच्च निकाय राष्ट्रिय सहकारी महासंघले २८ औं राष्ट्रिय सहकारी महासंघ दिवस सहित तीन वटै दिवस एकै दिन मनाएको हो । महासंघले यसरी ३ वटै दिवसहरु कोअप डे को दिन मनाउने प्रचलन स्थापित गरेको छ । 

यस पटक आइसीएले तय गरेको थिम अमेरिकी राष्ट्रपति जो बाइडेनको यस पटकको चुनावी अभियानको नारासँग सम्बन्धित छ । बाइडेनले सन् २०२० को राष्ट्रपति निर्वाचनका बेला कोभिड प्रभावित अमेरिकी अर्थतन्त्रलाई उकास्न बिल्ड ब्याक बेटरको नारा तय गर्नुभएको थियो । निवर्तमान अमेरिकी राष्ट्रपति डोनाल्ड ट्रम्पले आफु निर्वाचित भइसकेपछि आयोजित सपथ ग्रहण समारोहलाई सम्बोधन गर्दै ‘अमेरिका फस्ट’ को अभियान सार्वजनिक गर्नुभएको थियो । त्यसको प्रत्युत्तर योजनाको रुपमा बाइडेनले सन् २०२० जुलाई जुलाई ९ बिहिबारका दिन आफ्नो गृह सहर नजिक आयोजित आधा घन्टा लामो चुनावी सभालाई सम्बोधन गर्दै ‘बिल्ड ब्याक बेटर’  नारा सार्वजनिक गर्नुभएको थियो । 

राष्ट्रपति बाइडेनको योजना वा नारासँग मिल्ने र सान्दर्भिक भएकाले पनि आइसिएले उक्त आशय मिल्दोजुल्दो थिम ‘रिबिल्ड बेटर टुगेदर’ थिम सार्वजनिक गरेको हो । खासगरी त्यसबेला बाइडेनले उक्त नारालाई भावी अमेरिकी आर्थिक विकासको योजनासँग जोड्नुभएको थियो भने पछि राष्ट्रपति निर्वाचित भैसकेपछि त्यसलाई निरन्रता दिदैं ७ ट्रिलियन अमेरिकी डलर बराबरको आर्थिक पुनर्उत्थान योजना सार्वजनिक गर्नुभएको थियो । ४६ औं अमेरिकी राष्ट्रपति बाइडेनले यस वर्ष जनवरी २० मा औपचारिक सपथ ग्रहण गर्नुभएको थियो ।