परिवारः
मेरो जन्म सन् १९५८ डिसेम्बर २८ मा फिलिपिन्समा भएको हो । बुबा (स्वर्गीय) पास्कुअल सान रोकी तथा आमा इलेना भ्यालेन्जुएला सान रोकेका हामी ६ सन्तान हौं । म बाहेक अरु सबै विवाहित छन् । २ जना इन्जिनियर, २ जना शिक्षक र अर्का एक जना मेडिकल प्राविधिक छन् । म भने आकूमा कामको सिलसिलामा विगत २५ वर्षदेखि थाइल्याण्डमा बसोवास गरिरहेकी छु । महिला हुन पाएकोमा गर्व छ । महिला हुँदा सबैको बिशेष ध्यान खिच्दो रहेछ ।
शैक्षिक योग्यताः
लेखा विषयमा स्नातक म सर्टिफाइड पब्लिक अकाउन्टेन्ट पनि हुँ । अमेरिकाको युनिर्भसिटी अफ क्यालिफोर्निया बर्केलीबाट महिला नेतृत्व सम्बन्धमा प्रमाणीकृत कोर्ष पनि पूरा गरेकी छु ।
क्रेडिट युनियनमा संलग्नताः
सन् १९८८ देखि हालसम्म संलग्न रहँदै आएकी छु । एशियाली ऋण महासंघ आकूमा सन् १९९५ को फेब्रुअरी ५ मा वित्तीय सल्लाहकारको रुपमा प्रवेश गरेकी हुँ । त्यसपछि सन् २००० मा सदस्य सेवा प्रमुख हुँदै सन् २०१४ मा प्रमुख कार्यकारी अधिकृत नियुक्त भएकी हुँ । आकूको अन्तर्राष्ट्रिय सञ्जाललाई समेत गणना गर्ने हो भने १० जना उर्जाशील र क्षमतावान् महिलाहरुको दैनिक सम्पर्कमा रहेर काम गरिरहेकी छु ।
क्रेडिट युनियनका गुरुः
क्रेडिट युनियन अभियानको मेरो गुरु रञ्जित हिताराची हुनुहुन्छ जो आकूको पूर्व प्रमुख कार्यकारी अधिकृत हुनुहुन्थ्यो । अहिले रञ्जित म्यानमार परियोजनाका साथै आकूको प्राविधिक विज्ञ समूहको प्रमुख हुनुहुन्छ ।
आकूमा पदावधिः
आकूबाट अवकाश लिन तीन वर्ष मात्र बाँकी छ । यद्यपि, अवकाश जिवन पछि पनि मौका मिलेसम्म बचत तथा ऋण सहकारी क्षेत्रमै स्वेच्छिक सेवामा समर्पित रहनेछु । बचेको समय परिवारसँग समय बिताउँछु ।
स्वभावः
मलाई हत्तपत्त रिस उठ्दैन तर जब मेरो आ अरु कसैको क्षेत्राधिकार भित्र हस्तक्षेप भयो भने सहन सक्दिन । म भन्दा जान्ने अरु कोही छैन भन्ने अधिक घमन्डी व्यक्ति मलाई मन पर्दैन ।
खानपिनः
मेरो मनपर्ने खाना मेवाको मसालेदार सलाद (सम्टम्) हो ।
मनपर्ने रङ
नीलो पहेंलो रङ मलाई बढी मनपर्छ ।
फुर्सद र रुचिः
बिदा मनाउन सबैभन्दा मनपर्ने स्थान फिलिपिन्सको बोराके समुद्री तट हो । खाना पकाउने, गीत गाउने र कोरियन उपन्यास पढ्ने मेरो रुचि हो । यद्यपि, खानाका नयाँ परिकार पकाउने वा स्वाद लिने व्यक्ति (फुडी) भने म होइन । फुर्सदको समय व्यायाम (जीम) गरेर र टेलिभिजन हेरेर बिताउछु । मेरो लागि रमाइलो दिन भनेको व्यायमशालामा समय दिने, इमेल हेर्ने, परिवारका सदस्यहरुसँग भिडियो कल गर्ने र टीभी हेर्ने हो ।