कोभिड–१९ का कारण तपाईको दैनिक कार्य सम्पादनमा कस्तो परिवर्तन आएको छ ?
अरु सबै कामकाजी व्यक्तिहरुलाई झै, कामका लागि भौतिक रुपमा कार्यालय जानुपर्ने नियमिततामा कोभिडको प्रकोपसँगै लागेको रोकले म पनि स्तब्ध छु । हामी सहकारीमा काम गर्नेहरु त झन् बढी जनसम्पर्कमा रहनुपर्छ । दैनिक थुप्रै व्यक्तिहरुसँग भौतिक रुपमा भेटेर कुराकानी गर्दथे । कुनाको वासिङ्टन कार्यालय भौतिक रुपमा पनि खुला र पारदर्शी ढंगले बनाइएको छ, जहाँ अन्य कर्मचारीहरु झै म पनि एउटा सानो चेम्बरमा स्वतन्त्रपूर्वक थुप्रै यस क्षेत्रका व्यत्तिहरुसँग सहकार्य र सहकारिताको लागि भेटघाट गर्दथे । बाटोमा पनि म धेरै हिड्दथे, क्रेडिट युनियनका कार्यालयहरुमा पस्ने र त्यहाँ कर्मचारीहरुसँग उनीहरु र आफ्ना कामकारवाहीका बारेमा जानकारी लिने र दिने गर्दथे तर अहिले परिस्थिति फेरिएको छ ।
कोभिडको प्रभाव सुरुभए यता मेरो घरको कार्यालयमै एक्लै बसिरहनुपर्दा दैनिकी पक्कै फेरिएको छ । तर पनि म यसै क्षेत्रका मानिसहरुसँग प्रविधिसँग जोडिएर दिनभरि कुरा गरिरहन्छु । इन्टरनेट तथा फोनका माध्यमबाट दैनिक सम्पर्कमा छु । पहिलाभन्दा बढी नै इन्टरनेट र फोनमा समथ व्यथित गर्ने काम बढेको छ । क्रेडिट युनियनका समकक्षीहरुसँग, नियामक निकायका कर्मचारीहरुसँग र अन्य सरोकारवालाहरुसँग सामान्य अवस्थामा भन्दा अहिले पक्कै नै बढी समय कुराकानी गर्न पाएको छु ।
क्रेडिट युनियनहरुबाट कस्ता कुराहरु आइरहेका छन् अहिले ?
म साँच्चिकै क्रेडिट युनियनहरुप्रति कृतज्ञ छु । अहिले वास्तविक रुपमा भन्ने हो भने हामीहरुबीच एकदमै इमान्दार र खुल्ला वार्तालापहरु हुन्छन् । संकटको समयमा हामी सबै क्रेडिट युनियनहरु एकजुट भएर आफ्ना सदस्यहरुका लागि हरसम्भव सहयोग गर्न साँच्चिकै लागिपरेक छौं भन्नेप्रति सबैजना गम्भीर पाएँ । त्यसैले मैले अहिले सुन्ने पहिलो कुरा हो अभियानका रुपमा ‘हामी’ भन्ने सबैको प्रतिबद्धता । यो समय जो जति सीइओहरुसँग कुरा गरे उनीहरु सबैजना ‘अब हामी के गर्ने ? यो समस्या हामी कसरी समाधान गर्ने ? हामी कसरी अगाडि बढ्ने ? ’ भन्ने सबैको जिज्ञासा पाएँ । यो समय मैले कुरा गरेका एक जना पनि सीइओले ‘भयो, धन्यवाद । मेरो क्रेडिट युनियनको चिन्ता गर्नुपर्दैन । हामी आफ्नै तरिकाले काम गर्छौ ’ भनेको पाइनँ ।
कुनाको नेतृत्वको रुपम यो एकदमै उत्प्रेरणा दिने कुरा हो कि हाम्रा सदस्यहरु हामीसँग मिलेर काम गर्न र अघि बढ्न चाहन्छन् । त्यही भएर हामीले हाम्रा प्रत्येक सदस्यहरुलाई हरेक प्रकारका समस्यामा सहजिकरण गर्ने प्रत्यनलाई थप बलियो बनाएका छौं । त्यसका लागि दैनिक टेलिफोन तथा अन्य अभौतिक माध्यमबाट सम्पर्क गर्ने विधि स्थापित गरेका छौं । म बारम्बार यो समयमा श्रोत र मार्गनिर्देशन आवश्यक परेको हाम्रा सदस्य संस्थाहरुबाट सुनिरहेको छु । सदस्यहरुलाई आवश्यक सहयोग गर्नु, उनीहरुले खोजेको बेला उपलब्ध हुनु र उनीहरुको मागको सम्बोधन गर्नु हाम्रो कर्तव्य र दायित्व हो । उनीहरुका यावत् समस्याहरुको संगठित, वैज्ञानिक र सामयिक समाधानका लागि “कोभिड–१९ श्रोत केन्द्र” को जन्म भएको हो । त्यसैगरी, हामीले कोभिड–१९ रिस्टार्ट एण्ड रिकभरी टास्क फोर्सको पनि स्थापना गरेका छौं । स्वास्थ्य सचेतनाका लागि इ–स्कूलको व्यवस्था पनि छ ।
हामीले जस्तो सुकै आकार र अवस्थाका क्रेडिट युनियनलाई सहयोग गरिरहेका छौं । गएको साता मात्र हामीले साना क्रेडिट युनियनहरुलाई महामारीको समयमा समुदायमा सामना शक्ति कायम राख्न के कस्ता आवश्यकताहरु छन् र तिनको समाधानमा रहेको चुुनौतीहरु बारे निःशुल्क वेबिनार सत्र चलायौं । यी सबै काममा सहकार्यहरु जोडिएका छन् । हाम्रो समूह देशभरका सबै क्रेडिट युनियनहरुलाई आवश्यक सहयोगका लागि खटिएको छ ।
महामारी र आर्थिक संकटसँग जुध्ने विषयमा क्रेडिट युनियनहरुले गरेका कुनै कार्यबाट तपाई अचम्मित् हुनुभएको छ ?
कोभिड–१९ बाट उत्पन्न परिस्थितिको सम्बोधनलाई लिएर क्रेडिट युनियनहरुले चालेको कदमबाट म अचम्मित् छैन । मलाई अभियानसँग एकदमै भरोसा छ । जब हामी “सदस्यहरुद्धारा सदस्यहरुकै लागि सहयोग” भन्छौ, त्यो साँचो अर्थमा भन्छौं, देखावटी होइन । जब म यो पदबाट अलग हुन्छु, तब यो अभियानमा संलग्न रहेको दौरान मैले अभियानकर्मीहरुसँग गरेका हजारौं वार्तालापहरुको हिसाब निकाले भने, क्रेडिट युनियनहरुले सहयोग पुर्याएको मानिसहरुको संख्या साँच्चिकै अपत्यारिलो झै निस्कनेछ ।
क्रेडिट युनियनको विश्वव्यापी ध्येय र मुल्यप्रति हाम्रा सदस्य संस्थाहरुकोे लगाव र समर्पणप्रति म एकदमै आभारी छु । यसैगरी, हाम्रा कर्मचारीहरुको कामको पनि उच्च मुल्याङ्कन गर्न चाहन्छु । मलाई लाग्दैन कि कुनै पनि ऋण अधिकृत वा टेलरले विश्वव्यापी महामारीको समयमा यस प्रकारको सेवा प्रदान गर्नुपर्छ भन्ने अपेक्षा विगतमा गरेका थिए होलान् । तर पनि उनीहरुले एकदमै बहादुरीपूर्ण काम गरेका छन् । कार्य सम्पादनमा कुनै कमी हुन दिएका छैनन ।
यसैगरी, विभिन्न ठाउँहरुबाट मैले खबर प्राप्त गरेको छु कि क्रेडिट युनियनका कर्मचारीहरुले कोभिड महामारी प्रभावित सदस्यहरुलाई दिलोज्यानले सहयोग गरेका छन् । आकस्मिक ऋण, हर्जाना छुट, वित्तीय योजना निर्माणमा सहयोग, पीपीपी ऋण सहयोग लगायत थुप्रै किसिमका सहयोग पुर्याएका छन् । यसैकारण बढीभन्दा बढी मानिसहरुले क्रेडिट युनियनहरुले यो आपतको समयमा पुर्याएको अथक सहयोग बारेमा आफ्ना भावनाहरु अभिव्यक्त गर्न सकुन भनेर हामीले AmericasCreditUnions.org को पुनः सुरुवात गरेका छौं । यसकारण म अचम्मित् होइन गौरव महसूस गरिरहेको छु ।
सामाजिक न्याय तथा जातीय विभेद विरुद्ध किन सधै तपाई आवाज उठाइरहुनभएको छ ?
यो एकदमै कठिन छ । साँच्चै भन्ने हो भने एउटा गोरो छाला भएको र सामाजिक आर्थिक अवस्था राम्रै भएको अमेरिकी नागरिकको नाताले मैले यस्ता विषयका विरुद्धमा केही बोल्नु पर्ने वा बहस गर्नुपर्ने आवश्यकता होइन । आफुलाई प्रत्यक्ष असर नपर्ने विषयमा मौन रहन वा आफुलाई अलग्ग राख्न कुनै असजिलो पनि थिएन । यद्यपि, समयले मलाई के सिकाएको छ भने मेरौ मौनता पीडादायक हुन्छ । व्यक्तिगत तथा व्यावसायिक रुपमा पनि मैले धेरै व्यक्तिहरुसँग छलफलहरु गरेको छु जसले के टुङ्गोमा पुर्याएको छ भने जातीय विभेद तथा असमानता जति अरुका समस्या हुन्, ती त्यति नै मेरा पनि हुन् ।
मलाई के पनि लाग्छ भने सकारात्मक परिवर्तनको प्रत्याभूतिका निम्ति क्रेडिट युनियन अभियानको महत्वपूर्ण भूमिका छ । हामी लाखौं अमेरिकीहरुको वित्तीय सक्षमताको लागि सहयोग पुर्याउँदछौं र त्यो कामको सफलताको लागि पनि हामीले यस्ता विभाजनका पर्खालहरु भत्काउने अभियानमा साथ दिनुपर्छ । आखिर जो यस्तो अन्यायमा परिरहेका छन्, उनीहरु पनि त हाम्रै सदस्य हुन । अहिलेको समयमा यो एकदमै महत्वपूर्ण छ ।
सन् २०२० को बाँकी समय तपाईका प्राथमिकताहरु के हुनेछन् ?
सन् २०२० को बाँकी समयका बारेमा म केही पुर्वानुमान गर्न चाहन्न किनकि समय नै यस्तै छ । यो वर्ष यदि हामीले एउटा मात्र कुरा सिक्यौ भने, त्यो भनेको कुनै पनि कुराको पुर्वानुमान असम्भव छ भन्ने नै हो जस्तो लाग्छ । यद्यपि, परिस्थिति अनुसार मेरो अबको ध्यान पनि अघि भनेजस्तै क्रेडिट युनियनका लीग तथा प्रारम्भिक संस्थाका सञ्चालक तथा व्यवस्थापन समूहहरुसँग निरन्तर सम्वादमा रहने नै हो । यो समयमा मलाई क्रेडिय युनियन लीगहरुले आयोजना गरेका थुप्रै भर्चुअल छलफलहरुमा भाग लिने अवसर प्राप्त भयो । त्यस्ता छलफलका माध्यमबाट देशका विभिन्न भागमा रहेका क्रेडिट युनियनहरुसँग निरन्तर सम्पर्कमा रहन सम्भव भयो । यसैगरी, नियमित सञ्चालन हुने कुना र लीग वकालत सम्पर्क मञ्च तथा ट्वीटरका माध्यमबाट समेत बहुउपयोगी छलफलहरुमा भाग लिने मौका मिलेको छ । यी माध्यमबाट केही चासो र गुनासो भएका विभिन्न सीइओहरुसँग प्रत्यक्ष छलफल गर्न सम्भव भएको छ । म विश्वस्त र सुरक्षित रुपमा भन्न सक्छु, यो बीचमा मैले ३,४०० भन्दा बढी सीइओहरुसँग अभौतिक रुपमा प्रत्यक्ष सम्वाद गरिसकेको छु ।
अब हामी सबैले बुझिसक्यौं, यो महामारी सजिलै र चाँडै हामीबाट बिदा हुँदैन । यसले गर्दा हाम्रा आर्थिक चुनौतीहरुपनि हामीसँग लामो समयसम्म रहने छन् । त्यही भएर यस्ता दूरगामी चुनौतीहरुको सामना सहकार्यका आधारमा एकभएर गर्नुको विकल्प छैन । अब यो वर्षको मेरो बाँकी समय सदस्य क्रेडिय युनियनका कुराहरु सुन्ने, उनीहरुका प्रयास र सुझाबहरुबाट सिक्ने र सदस्यहरुलाई आवश्यक सहायता उपलब्ध गराउने काममा नै खर्च हुनेछ ।