‘सोचे भन्दा बढी सिक्न पाएँ, सुनमा सुगन्ध भयो’
रञ्जनमणि पौड्याल
- रञ्जनमणि पौड्याल
‘सोचे भन्दा बढी सिक्न पाएँ, सुनमा सुगन्ध भयो’

नेपाल बचत तथा ऋण केन्द्रीय सहकारी संघ लि.(नेफ्स्कून) को आयोजनामा २०८० साल फागुन ११ गते बाट १५ गते सम्म भक्तपुर जिल्लाको नगरकोटमा ५ दिने Training of Trainers on Business Development Services (ToT on BDS) तालिम सञ्चालन गरिने सूचना संघबाट म कार्यरत संस्थामा प्राप्त भयो । संस्थामा प्राप्त सूचनाहरु बारे उच्च व्यवस्थापन समूहमा नियमित छलफल हुने हाम्रो संस्थाको नीतिगत व्यवस्था नै छ ।

पोखरा रोयल बचत तथा ऋण सहकारी संस्था लि.ले कर्मचारीहरुलाई नियमित तालिमहरुमार्फत क्षमता विकासमा जोड्दै आएको छ । नेफ्स्कूनले आयोजना गर्ने तालिमहरु स्तरीय हुने हुँदा प्रायः संस्थाबाट सहभागिता जनाउने गरिन्छ । व्यावसायिक योजना निर्माणका लागि यो तालिम उपयोगी र सहयोगी हुन्छ भन्ने निश्कर्षका सहभागिता जनाउने निर्क्यौल गरिएको थियो । सहभागिता जनाउने टुङ्गो भएपछि, तालिमको सुचना अनुसार, तालिमको विषय, सहभागीको योग्यता, सहभागिताको लागि प्राथमिकताको आधारमा सहभागी छनौट गर्ने गरिन्छ । यी सबै यसैको आधारमा उक्त तालिममा सहभागिताका लागि मेरो नाम छनौट भई निर्णय भएको सूचना प्राप्त भयो  । 

तालिममा छनौटको सूचनाले स्वाभाविक रुपमा खुसीको सञ्चार गर्यो, उत्साह छायो । नेफ्स्कूनका तालिमहरु स्तरीय हुने हुँदा अपेक्षाहरुको स्वीटर बुन्न थालेँ । तर, हत्तनपत्त अर्को पाटो सोचेँ । ‘मेरो त २ वर्षको सानो बाबु छ । कसरी जाने ?’ उसको हेरचाह मेरो झनै ठूलो प्राथमिकता हो । मन सोचमा डुब्यो । महिलाहरुले आफ्नो कलिलो सन्तानको बिशेष हेरचाह गर्नुपर्ने हुन्छ । म त्यसको निरन्तर प्रक्रियामा थिएँ । घर सल्लाह गरेँ । श्रीमानबाट दरिलो साथ पाएँ । मेरो हुटहुँटी, इच्छा र अवसर पूरा गर्न श्रीमानले समय तिलाञ्जली दिनुभयो । आफ्नो व्यवस्तताबाट समय निकाल्नुभयो । हामीले निर्णय गर्यौं । तीनै जना काठमाडौं आयौं ।  

मेरो लागि प्रशिक्षक प्रशिक्षण (टट) को यो पहिलो अनुभव सँगाल्ने अवसर पनि थियो । यद्यपि, नेफ्स्कूनले प्रदान गरेका छुट्टाछुट्टै विषयका ४ ओटा तालिममा सहभागी भएको कारण पनि यो तालिमबाट धेरै सिकाइ हुने विश्वास बोकेर म सपरिवार काठमाडौं आएँ । Training of Trainers on Business Development Services (ToT on BDS) तालिममा भाग लिन जान पाउने कुरा नै मेरो लागि महत्वपुर्ण थियो अझ त्यसमाथि मेरा लागि पहिलो आवासीय तालिम भएकाले उत्सुकता झनै उकालो लागेको थियो । तालिमको विषयवस्तुमा केही खोजी पनि गरेँ । 

हिड्ने दिन नजिकियो । तयारीहरु बढे अनि खुसीहरु फैलदै गएँ । पोखरादेखि काठमाडौ र काठमाडौदेखि पोखरा सम्मको यात्रा संस्थागत रुपमा व्यवस्थापन गरिएको थियो भने काठमाडौंदेखि नगरकोट र नगरकोटदेखि काठमाडौंसम्मको व्यवस्थापन नेफ्स्कूनबाट गरिएको थियो । यात्रा एकदम सहज अनुभव भयो । नगरकोटको बसाइ पारिवारिक वातावरणसहित आरामदायी र रमाइलो भयो ।