काडमाडौं । बचत तथा ऋण सहकारी संस्था सम्बन्धी स्थिरीकरण कोषको पहिलो वार्षिक परामर्श बैठक सम्पन्न भएको छ । वैठकको उद्घाटन भूमि व्यवस्था सहकारी तथा गरिबी निवारण मन्त्रालयका सचिव डा. दामोदर रेग्मीले गर्नुभएको थियो । नेफ्स्कूनका अध्यक्ष परितोष पौड्यालको अध्यक्षतामा आयोजित समारोहमा राष्ट्रिय सहकारी महासंघका अध्यक्ष मिनराज कडेल, विभागका रजिष्ट्रार रुद्रप्रसाद पण्डित, प्रदेश सांसद ज्ञानबहादुर तामाङ, युवा तथा साना व्यवसायी स्वरोजगार कोषका कार्यकारी उपाध्यक्ष देवराज रोकाय (कल्याण), नेफ्स्कूनका कोषाध्यक्ष दिपक पनेरु, संघका कानुनी परामर्शकर्ता अधिवक्ता शिव अधिकारी, स्थिरीकरण कोष सञ्चालन समितिका सदस्यहरु लगायत कोषमा योगदान गर्ने सदस्य संघ संस्थाका प्रतिनिधिहरुको विशेष उपस्थिति रहेको थियो । 

समारोहका प्रमुख अतिथि सचिव रेग्मीले बचत तथा ऋण सहकारी अभियानले प्राप्त गरेको उपलब्धीलाई आजको दिनमा कहिँ कतै शंका नगरि समस्या समाधानतर्फ उन्मुख हुनुपर्ने बताउनुभयो । उहाँले समस्या सबैतिर व्याप्त रहेको जानकारी गराउँदै सहकारी क्षेत्रले समस्याको उजागार गर्ने नभई सकारात्मक सन्देश प्रवाह गर्दै अभियान भित्रैबाट समाधानउन्मुख कार्यमा जुट्न र त्यसका लागि सहकारी मन्त्रालय र विभाग हरेक गतिविधिमा सहकार्य गर्न तयार रहेको बताउनुभयो । सहकारीमा समस्या छन् भने त्यो समस्या ल्याउनमा तपाईं हामी नै जिम्मेवार रहेको प्रति संकेत गर्दै सचिव रेग्मीले सहकार्यको संस्कृति विकास गर्दै नीतिगत र कार्यगत विषयहरु अगाडि बढाउने दिशामा मन्त्रालय र विभाग केन्द्रीत रहेर लागिपरेको स्पष्ट पार्नुभयो । 

महासंघका अध्यक्ष मिनराज कडेलले बचत तथा ऋण सहकारी संस्था सम्बन्धी स्थिरीकरण कोषमा रहेको रकम साकोसको योगदान रकम रहेकोहुँदा यसमा सबै साकोसको अनिवार्य आवद्धता रहनुपर्ने बताउनुभयो । उहाँले भन्नुभयो, “बचत तथा ऋण सहकारी संस्थाहरु जोखिममा पर्न नदिन र कथम कदाचित जोखिममा परिहाले बचाउने कोषको रुपमा स्थिरीकरण कोष रहेको छ, यो वित्तीय संकट समाधानका लागि अत्यन्त महत्वपूर्ण कोष हो र यसमा साकोसको अनिवार्य आबद्धता रहनुपर्छ ।”

सहकारी ऐनको व्यवस्था अनुरुप कर्जा सूचना केन्द्र र कर्जा असुली न्यायाधिकरण सञ्चालनमा आएको भए र सहकारी प्रवर्धन कोष साथै बचत तथा ऋण सुरक्षण कोष लागु हुन सकेको भए विद्यमान आर्थिक समस्या सहकारीमा आइनपर्ने अध्यक्ष कडेलले बताउनुभयो । 

कार्यक्रममा कोष सञ्चालन समितिकी सदस्य ज्ञानु पौड्यालले स्वागत मन्तव्य व्यक्त गर्दै स्थिरीकरण कोष साकोसको सुरक्षा कवचको रुपमा रहेको र यसले जोखिम मुक्त, दिगो र भरपर्दो बचत तथा ऋण सहकारी अभियान निर्माणमा ठोग योगदान पुर्याउने विश्वास लिइएको बताउनुभयो । कोषको प्रभावकारी कार्यान्वयनका लागि स्पष्ट कार्यविधि साथै साकोसहरुको अनिवार्य आबद्धतामा रहनुपर्नेमा जोड दिँदै कोषमा योगदान गर्नुहुने सम्पूर्ण योगदानकर्ताहरुलाई धन्यवाद सहित कार्यक्रममा उपस्थित सम्पूर्णलाई स्वागत गर्नुभएको थियो ।   

कार्यक्रम सञ्चालन कोषका सदस्य सचिव एवं नेफ्स्कूनका प्रमुख कार्यकारी अधिकृत प्रकाश प्रसाद पोखरेलले गर्नुभएको थियो । उहाँले स्थिरीकरण कोष स्थापना तथा सञ्चालन कार्यविधि २०७६, माथी संशोधन गरी स्वीकृतिका लागि मन्त्रालयमा पुगेको, तरलता सापटी, मानव संशाधन विकास, आर्थिक गतिविधि, वैठक सञ्चालन लगायतका कार्यविधिहरु तयार गरिएको जानकारी गराउनुभएको थियो ।